ബെംഗളൂരു: പെരുന്നാൾ തിരക്കിൽ ബെംഗളൂരുവിൽനിന്നു പരമാവധി ബസുകൾ അയയ്ക്കുമെന്നു കേരള ആർടിസി അറിയിച്ചു. റോഡിൽ വലിയ തടസ്സങ്ങൾ ഉണ്ടായില്ലെങ്കിൽ എറണാകുളം, തൃശൂർ, കോഴിക്കോട്, ബത്തേരി, കണ്ണൂർ, പയ്യന്നൂർ എന്നിവിടങ്ങളിലേക്കായി എട്ടു സ്പെഷൽ ഇന്നുണ്ടാകും.
ഇന്നലെ നാട്ടിൽനിന്നുള്ള ബസുകൾ എത്താത്തതിനാലാണ് ബെംഗളൂരുവിൽനിന്നുള്ള മൂന്നു ഷെഡ്യൂളുകൾ റദ്ദാക്കേണ്ടി വന്നത്. ഉച്ചയ്ക്ക് ഒന്നിനും 2.15നും പുറപ്പെടുന്ന തിരുവനന്തപുരം സ്കാനിയ, മൂന്നിനുള്ള പിറവം ബസുകളാണ് റദ്ദാക്കിയത്. ഈ ബസിൽ നേരത്തേ ടിക്കറ്റ് ബുക്ക് ചെയ്ത യാത്രക്കാരെയെല്ലാം ഫോണിൽ വിവരം അറിയിച്ചു. ഇവർക്കു ടിക്കറ്റിന്റെ മുഴുവൻ പണവും തിരിച്ചുനൽകും.
ഈ സർവീസുകൾ റദ്ദാക്കിയതിലൂടെ ലക്ഷക്കണക്കിനു രൂപയുടെ നഷ്ടമാണ് കെഎസ്ആർടിസിക്കുണ്ടായത്. അതേസമയം സേലം, കോയമ്പത്തൂർ വഴിയുള്ള സർവീസുകൾ മുടങ്ങിയിട്ടില്ല. ബെംഗളൂരുവിൽ നിന്നുള്ള കേരള ആർടിസി സർവീസുകൾ സംബന്ധിച്ച വിവരങ്ങൾക്ക് 080–26756666 (സാറ്റ്‌ലൈറ്റ് ബസ്‌ സ്റ്റാൻഡ്), 080–22221755 (ശാന്തിനഗർ), 8762689508 (പീനിയ) എന്നി നമ്പരുകളിൽ ബന്ധപ്പെടാം.
